Udako Jardueretan izena eman daiteke apirilaren 11ra bitartean

Aurtengo udan ere, 2-12 urte bitarteko haurrentzat eta DBH 1, 2 eta 3. mailako gaztetxoentzat Udako Jarduerak antolatu ditu Zaldibiako Udalak, ekainaren 30etik uztailaren 24ra.

2 urtetik 12 urtera bitarteko haurrentzako jarduerak:

Udako Jarduerak ekainaren 30etik uztailaren 24ra bitartean izango dira, astelehenetik ostiralera, goizeko 10:00etatik 13:00etara.
Aurtengoan, matrikula bateratu egin nahi izan du Udalak, eta kuota bakar baten barnean sartuko dira matrikula eta gainerako jarduera eta irteera guztiak. Hala, HH-ko eta LH-ko haurrek 90€ ordainduko dute Udako Jardueretan parte hartzeko. Hobari sistema zabala aurreikusi da laguntza behar duten familiek edo familia ugariek kuota hori ordaintzeko arazorik izan ez dezaten.
Jardueretan parte hartu nahi dutenek eskolan banatuko zaien izen-emate orriak beteta eraman behar dituzte Kultur Etxera.
 

Izena emateko azken eguna: apirilak 11, ostirala.

Izena ematen duten haurren familiekin bilera bat egingo da ekainean, eta begiraleen aurkezpena egiteaz gain, programazioaren azalpen orokorra azalduko zaie. 

DBH1, DBH2 eta DBH3ko gaztetxoentzako jarduerak:

DBHko gaztetxoentzat eskaintza berezia antolatuko du Zaldibiako Udalak Udako Jarduren baitan, eta uztailean zehar hainbat egunetan irteerak egingo dituzte DBH 1, 2 eta 3. mailako ikasleek. Jarduera hauetan parte hartzen dutenek, 110 euroko matrikula ordaindu behar dute, eta prezioaren barruan sartuko dira egiten dituzten jarduera guztiak. 

Aurreko urteetan egin izan den moduan, jardueretan parte hartu behar duten gaztetxoen familiekin ekainean bilera bat antolatuko da, eta begiraleen aurkezpena egiteaz gain, programazioaren azalpen orokorra emango zaie.

ORDAINKETAN ALDAKETA

Orain arte, Udako Jardueretan izena ematerakoan ordaintzen zen matrikula, baina aurten ez da horrela egingo. Izena ematerakoan, kontu zenbakia zehaztu beharko dute gurasoek izen-emate orrian, eta ekainean helbideratuko da kobrantza orokorra. Hobariak edota kasu bereziak banan-banan aztertuko dira, eta kobrantza egin aurretik jakinaraziko zaio familia bakoitzari zenbateko kuota ordaindu behar duen.

Familiengandik izen-ematean jasoko diren Udako Jardueren gastu osoaren %40ari egingo dio aurre, eta gainerako %60a Udalak ordainduko du.

Aurreikusi da guztira gastua 45.000 € ingurukoa izango dela. Bertan sartuta daude: begirale ikastaroa, aukeraketa, begiraleen soldata eta gizarte segurantza, haurren asegurua, HHkoen eguneroko hamaiketakoa eta ekintza gastuak. Bestetik, sarrera iazko izen-ematea kontutan izanik 19.180€ ingurukoa izango litzateke, baina honi familiek jasoko dituzten hobariak kendu beharko litzaizkioke.

Izen-emate orria (jarraian duzue deskargatzeko moduan) beteta eta sinatuta eraman behar da kultur etxera apirilaren 11, ostirala, baino lehen.

HOBARIAK

Zaldibiako Udalak Udako jardueren hobariak eskatzeko epea ireki du izen-ematearekin batera. Bi motako hobariak egongo dira. 

• Familia ugarientzako hobariak. Familia horiek Familia ggari izateagatik %15eko hobaria izango dute seme-alaba batek izena ematen badu Udako jardueretan; bi seme-alaba inskribatzen badituzte %30eko hobaria eta hiru seme-alabak edo gehiagok parte hartzen badute %40ko hobaria.
• Errentaren araberako hobariak, lanbide arteko gutxieneko soldata kontutan hartuta. Kasu horretan familiek euren errentaren araberako hobaria izango dute

Bi hobariak ez dira bateragarriak izango, baina eskatzailearentzat mesedegarriena dena aplikatuko da.

Hobaria jasotzeko aurkeztu beharreko dokumentazioaren inguruko informazio zehatza Karreane kultur ktxean jaso dezakete familiek, eta bertan azalduko zaizkie dokumentazioa aurkezteko egin beharreko urratsak zein diren. 

GARRAIOA

Otsailetik 12 urtez azpiko haurrek doako autobus zerbitzua dute, MUGI txartela erabiliz gero. Udako Jardueretan hainbat irteera egiten dira autobusean, eta udalak gomendatzen du 6 urtetik aurrerako haurrek MUGI txartela edukitzea, doako garraioa izan dezaten.

MUGI txartela herrian bertan egin daiteke, Goiko okindegian, edo internet bidez eskatu. Bi kasuetan honako dokumentazioa aurkeztu behar da:

• Adingabearen NAN, Atzerritarren Identifikazio Txartela edo pasaportea halakorik badu. Bestela, familia liburuaren fotokopia (adingabearen datuak agertzen diren orrialdean).
• Karneteko argazkia.
• Formularioa behar bezala beteta (Okindegian eskuratu daiteke).
• Tutorearen NANaren, pasaportearen edo Atzerritarren Identifikazio Txartelaren fotokopia.
• Txartelaren kostua 5€koa da, eta eskaera egiterakoan ordaindu behar da.