Udako Jardueretan begirale izateko deialdia ireki du udalak
Aurten, ekainaren 30etik uztailaren 24ra izango dira Udako Jarduerak, eta horietan begirale gisa lanean jardun nahi dutenek gaurtik apirilaren 11ra bitartean eman dezakete izena deialdian.
Udako Jardueretan begirale izateko honako baldintzak bete beharko dituzte hautagaiek: 18 urte beteak izatea edo 2025ean zehar betetzea; begirale titulua izatea edo gutxienez Zaldibiako Udalak antolatutako 20 orduko ikastaroa egin izana, eta euskara ondo menderatzea. Horrez gain, haur eta nerabeekin lanean izandako esperientzia ere baloratuko da hautaketa prozesuan.
Hautaketa prozesuak bi zati izango ditu. Alde batetik, hautagaiek begirale lana egiteko duten gaitasuna baloratuko da talde elkarrizketen bidez. Apirilaren 12an egingo dira talde elkarrizketak goizeko ordutegian. Bestetik, hautagaien CV-aren balorazioa ere egingo da. Hautaketa prozesua Hezten elkarteak bideratuko du.
Hautaketa prozesuan parte hartzen dutenekin zerrenda osatuko du Udalak, lortutako puntuazioaren arabera. Ondoren, haur eta gaztetxoen izen-ematea bukatzen denean, zenbat begirale behar diren zehaztuko da, eta aukeratuak izan diren jakinaraziko zaie hautagaiei.
Deialdian izena eman nahi dutenek gaurtik apirilaren 11ra bitartean izango dute horretarako aukera CV-a Karreane Kultur Etxean aurkeztuta, edo kulturetxea@zaldibia.eus helbidera bidalita. Deialdiaren inguruko informazio osatua nahi dutenek 943160338 telefono zenbakira deitu dezakete.
