Udal irudi berria, ERABAKIA HARTZEKO GARAIA HELDU DA!
Udalaren irudi berria aukeratzeko prozesua azken txanpan sartzera doa. Herritarren artean informazioa banatu eta galdetegiak jaso zituen Jarraipen batzordeak. Prozesuarekiko adostasun zabala jaso da eta aurkezten diren lau irudietakoren batek Udal irudi berria izateko balio duela adierazi zuen galdetegia bete zuten herritarren gehiengoak. Hau horrela izanik, 2020ko abenduaren 14tik abenduaren 20ra aurkeztutako lau irudiak bozkatu ahalko dira Karreane kultur etxean. ERABAKIA ZURE ESKU! Hemen duzue informazio guztia.
GALDETEGIAREN ONDORIOAK:
Jarraipen batzordeak 2020ko abenduaren 1ean egindako bileran baloratu zituen jasotako galdetegietako emaitzak. Emaitzak eskuan izanda hainbat ondoriotara iritsi ziren. Ondorio guztiak osoko bilkuran aurkeztuko diren arren, horien artean garrantzitsuenak aurkezten dizkizuegu:
- Parte hartzeari dagokionez, jasotako galdetegi kopuruarekin gustura zeuden kideak.
- Galdetegian planteaturiko prozesuarekiko adostasun zabala jasotzen zenez, prozesuarekin aurrera jarraitzea erabaki zen.
- Aurkezten ziren lau irudietakoren batek gutxienez Udal irudi berria izateko balioko lukeela adierazi zuen galdetegia bete zuten herritarren gehiengoak.
ZER ERABAKI:
Zaldibiako Udalaren irudi berria da aukeratuko dena. Irudi hau, Udalaren agiri ofizialetan, udal bitartekoetan eta komunikazio euskarrietan erabiliko da. Era berean, udal eraikin berriaren horma nagusian jarriko da. Zaldibiako Udalaren sinbolo edo ikur nagusia izango da, Zaldibiako Udala herritarren eta munduaren aurrean aurkezteko balioko duena.
Hainbat komunikabideetan plazaratutakoa zuzendu nahi dugu. Zaldibiako Udalak ez du bere armarri historikoa aldatuko. Hainbatek nahastu egin du udal irudia aldatzea eta armarria aldatzea. Zaldibiako Udalak garai bakoitzean erabili izan dituen ikur eta jatorrizko agiriak herriko artxibategian gordeko ditu, orain arte bezala. Era berean, gaur egungo udaletxea eraitsi aurretik, bertako horman kokatutako harlanduzko armarria osorik ateratzeko saiakera egingo da eta bere horretan gordeko da, harekin zer egin erabaki arte.
Azaroan aurkezturiko eta galdetegi bidez balioztatutako lau irudiren artetik bat aukeratu beharko da Zaldibiako Udalaren irudi berri gisa.
NORK ERABAKI:
2008an eta lehenago jaio eta Zaldibian erroldatutako herritarrek dute Zaldibiako Udal irudi berria aukeratzeko prozesuan parte hartzeko eskubidea. Pertsona bat, bozka bat printzipioan oinarrituta.
2009tik gaur arte jaiotako zaldibiarrek, Lardizabal herri ikastetxearen bidez, gelaka bozkatzeko aukera izango dute. Ikasgela bat, bozka bat.
NOLA ERABAKI
- KARREANE kultur etxera bertaratu beharko du parte hartu nahi duen herritarrak zehazturiko egun eta ordutegian. Santa Fe kaleko 24ean kokaturik dago.
- AUKERAN DAUDEN IRUDIEN INFORMAZIOA aurkituko du bertan, erabakia hartu aurretik kontsultatu ahal izateko. Prozesuari eta erabaki hartzeari buruzko zalantzak argitu eta azalpenak emango dizkion Jarraipen batzordeko pertsona bat egongo da uneoro bertan. Bozka emateko txartelak ere bertan izango dira eskura.
- BOZKATU AURRETIK, bertaratutako herritarrak bozka emateko eskubidea duen ziurtatuko dute Jarraipen Batzordeko kideek. Horretarako erabakian parte hartzeko eskubidea duten herritarren zerrenda izango dute eta hala beharko balitz nortasun agiria aurkeztea eskatu dezakete bozka emana ahal izateko.
- PERTSONA BAT BOZKA BAT. Bertan egongo diren boto paperetan, lau irudi agertuko dira eta irudi bakoitzaren azpian laukitxo bana. IRUDI BAT BAKARRA aukeratu behar da X marka jarriaz. Bat baino gehiago markatzen diren kasuan botoa baliogabea izango da eta zenbaketan ez da kontutan hartuko.
- OSASUN ARRAZOIAK MEDIO, bozkatzera etorri ezin duten herritarren erabakitzeko eskubidea bermatuko du Zaldibiako Udalak. Covid-19a dela eta bakartuta edo berrogeialdian egotera behartuta dauden herritarrek hala eskatzen badute beharrezko bitartekoak jarriko ditu Udalak herritar horien bozkak jasotzeko.
ERABAKITZEKO EPEA:
2020ko abenduaren 14tik 2020ko abenduaren 20ra bitartean parte hartu ahalko da ERABAKIA HARTZE PROZESUAN.
KARREANE kultur etxean kokatuko da boto kutxa. Santa Fe kaleko 24. Zenbakian.
Ondoren zehazturiko ordutegian:
- Abenduak 14, astelehena, 16:30 - 19:00
- Abenduak 15, asteartea, 16:30 - 19:00
- Abenduak 16, asteazkena, 11:00 - 13:00 eta 16:30 - 19:00
- Abenduak 17, osteguna, 16:30 - 19:00
- Abenduak 18, ostirala, 11:00 - 13:00 eta 16:30 - 19:00 PLAZAN (Eguraldia lagun bada)
- Abenduak 20, igandea, 11:00-12:00
KONTAKETA PUBLIKOA:
2020ko abenduaren 20an eguerdiko 12:00etan hasiko da Zaldibiako Karreane kultur etxean. Kontaketa saioan jarraipen batzordeko kideek soilik esku hartu ahalko dute.
Hala nahi duten gainerako herritarrek begirale izateko aukera izango dute. Covid-19 gaitzaren zabalpena ekiditeko protokoloak medio, aforo mugak behartuta herritarren bat sartu ezinik geratuko balitz eta hala eskatuko balu, boto kutxa zabaltzen denetik kontaketa amaitu arte bideo grabazio bidez jasoko litzateke zenbaketa guztia.
Jarraipen batzordeak kontaketaren emaitza Zaldibiako Udaleko osoko bilkurara eramango du, herritarrek erabakitakoa ofizializatzeko eta Zaldibiako Udalaren irudi berria izendatzeko.
Lotura interesgarriak:
